لو مثلاً

لو مثلاً.. الله يبا يختبرني بحبي.. أو صبري..

لو نفترض انّه الله كتبلي أحب شخص أكبر عنّي وساكن فمنطقة ثانية ومعرس وعنده عيال..

لو اتخيل انّي انا ما اتخيل نفسي بدون هالشخص، بس فداخلي شي يقول.. اني عقب ما التقيتبه اكيد بنفترق.. للأبد، وكل حد يروح بصوب.. لو مثلاً.. انا ما صدقت هالصوت..، لو مثلاً أنا متأكدة انّي بعيش وياه للأبد.. لو مثلاً كل هالخيالات حقيقة.. لو مثلاً فعلاً كنّا رباعة طول العمر..

لو مثلاً هو حبني.. لو مثلاً أنا حبّيته.. لو مثلاً الله كتب لنا.. لو مثلاً الناس باركولنا.. لو مثلاً الدنيا ابتسمت لنا.. لو مثلاً أحلامي تحققت كلها وياه.. لو مثلاً الله أهداني هالانسان يعوضني عن نقص حياتي.. لو مثلاً أنا ما بخليه وهو مستحيل يخليني.. لو مثلاً أعشقه وهو عشقني.. لو مثلاً نيب عيال.. لو مثلاً نسافر ونعيش أحلى الأيام.. لو مثلاً نبني بيت.. ونعمر بيت لله.. لو مثلاً فبيتنا يكون بستان.. لو مثلاً كل يوم يهديني وردة.. لو مثلاً كل يوم أعطيه بوسه.. لو نفترض حبنا كان اكبر من كل شي.. لو نفترض انه مافي ولا مشكلة تكبر علينا.. لو نفترض انه حبنا عاش فينا وأسرنا.. لو نفترض انه عيالنا كبروا وعرسوا.. لو نفترض نروح نحن الثنين عرسهم.. لو نفترض عيالنا يابو عيال.. لو نفترض انهم سمّوهم علينا.. لو نفترض انه خلاص نعن فعلاً لبعض.. ونعيش مع بعض.. ونبتسم لبعض، ونبوح لبعض، ونسطر حبنا قصّة.. ونقول.. مافي مستحيل.. ❤